DER SCHLUSSEL VOM WIISSU SCHAFT

Eine Erinnerung von:

AnnaMaria Tschopp, frei schaffende Schauspielerin

Wa isch er ächt jetz wider? Het nu eswels vertreelt? - Ich süechu der Schlussel vom wiissu Schaft!

Der wiiss Schaft isch im Meitjizimmer gschtannu; da dri hend ds Ruth und ds Rosmarie irusch Gwand versoorgt, d Reck und di Plüüsä, und obena ufum Tablar appa di Puloower und d Liibjini. T Unnerhosä, d Hämmlini und d Schtrimpf heiwer iner Komooda üfbiwaart. Di isch öü wiissi gsi, mit unnundir drii groossu Schubladä und z obruscht dera chleineru. Di hend alli öü Schlissel gcha – aber di het d Mama drabgnu, warschinli fer das mu schi nit verlierä.

Der Schlussel vom Schaft isch hingägu immer dra giplibu; ooni z pschliessu hetti d Schaftpoort jedufall nit züe gcha.

Aber wa heider de jetz der Schlussel?

Aa, jetz chunt mer z Si: Veliicht het nu d Mama abgizogu wilsch im Schaft eswas gigchaaltut het! Ds Margrit het baald Giburtstag, und wil das esonä Wundernasa isch und gääru uberall geit ga müüsu, hetsch ds Gscheich zer Sicherheit ipschlossu.

Nit? - Schi seit nei.

Der wiiss Schaft heisst übrigens esoo wils no der brüü Schaft git; der isch im unnru Chämmerli gschtannu, mit Wäärchzig vom Papa dri und mit du aaltu Schalblattä, denu dicku schweeru üs Schellack.

Schpeeter isch der wiiss Schaft de mit der Katharina uf Titschland greist, uf Frankfurt und nacher uf Heidelbäärg – und schliessli wider zrugg in d Schwiz.

Und da schteider jetz im Chinderzimmer vom Miro und der Luisa, mit dum Gwand vo denu beidu. Und esiä feeelt jetz äbu öü wider der Schlussel aner Poort, wil d Katharina di Ballä vom Miro ipschlossu het fer das der nit iner ganzu Wonig umfatschüttä.

Aber ich sellti der Schlussel jetz ha! D Luisa het eso inu Gillä umenandgiggätschut das iri Hosä pflotschnassi sind - schi brüücht fleeti!

- Ach, der Schlussel liggut obena druf?? De säget das doch!

Jedufall bini gottufroo isch er äntli fircha cho.